وانا جاي شغلي الصبح لقيت لمه وزحمة كبيرة جدا عند المريوطيه ، ولقيت عربيات كتيرة جدا راكنه علي الصفين ، وناس اكتر واقفه بتبص في قلب المريوطيه
لقيت نفسي بركن زيهم بشكل لا ارادي ، وبنزل من العربية جري ووبص فيه ايه !!
لقيت موتوسيكل واقع غطسان كله ماعدا اخر جزء في العجله الأخيره ، كان باين حته منها
وست كبيرة وشاب ومعاهم طفل في المايه
الحمد لله مفيش اي حد جراله حاجه لأنهم وقعوا علي الحرف مش في النص وكان تحتهم طينه
السبب ان سواق العربية حدف علي الموتوسيكل ، وخلى صاحبه اختل توازنه ووقع
وهنا بدأ صوت الأستغاثه يظهر
" حد معاه حبل ياجماعه !! حد معاه حبل ياجماعه !! "
اكتر من 15 عربية واكتر من 150 بني ادم بيأدوا دور المشاهد فقط دون اي مساعده
كأنهم قاطعين تذاكر سينما وجايين يتفرجوا علي الفيلم
انا مكنش معايا حبل علشان اقدمه ، وجايز هما كمان زي حلاتي
فضل المشهد ثابت لحد ماواحد بسيط بيته جنب الحادثه جاب " مولة سرير " وحطها
وجاب واحده تانيه كمل بيها الجسر اللي بيعمله ، وبدأت الست والشاب والطفل يطلعوا من عليها
الغريب ان الشاب عينه كانت علي الموتوسيكل .. تقريبا اكل عيشه من خلاله لأنه عليه صندوق من ورا يجوز بيشتغل طيار في احدي المطاعم وبيوصل اكل ..
جايز بتاعه او عهده عليه وفي كل الاحوال انقاذ الموتوسيكل لا يقل اهميه عن انقاذهم
لأنهم كده هيموتوا من المايه وكده هيموتوا من الجوع
بعد ماطلعهم واتطمن عليهم نزل تاني براحه علشان يشده ، لكن للأسف ، الموتوسيكل كان غطس اكتر واختفى بالكامل
نزل وفضل يمد ايديه في المايه واحده بواحده علشان يدور عليه لحد ما بدأ يتسحب للغوط وهو مش واحد باله .. وغطس وراه
حاجه غير متوقعه ، واتحول مشهد الانقاذ لمشهد غرق
واتحول الفرح لحزن .. وبدل شوفولنا حبل ياجماعه بقى شوفولنا كفن
كتير مننا بيتم انقاذه من الموت .. وبيتكتبله صفحة جديده وعمر جديد انه يكمل
لكن للأسف بنرجع نبص ورانا .. ونغطس في مشاكلنا من تاني ونغوص في ذكرياتنا المؤلمه .. وبدل مانفرح بأن الله وحده قدر يخرجنا ويعدينا المحن
بنرجعلها تاني برجلينا .. ونموت واحنا عايشيين
ونمشي نكلم نفسينا .. ويتسرق العمر مننا وفجأة نلاقينا موتنا بجد ..
وانتهت الحياة ومعرفناش نفرح فيها ولا ننبسط ، ولا نقدم اللي يبسطنا في الحياة التانيه " السما "
دي مش قصة .. دي كارثه
دلوقتي حالا مش كمان شوية .. امسك الحبل واطلع ومتبوصش وراك
سيب اللي راح يروح ، ومتضيعش عمرك في الجري ورا المشاكل
لأنها مش بتغلب وبتعرف ترجعلك لوحدها ..
ارجوك .. ماتستسلمش اكتر من كده ، وامسك في كل فرصة فرح
ياعالم مكتوبلك تعيش كام يوم كمان .....
